Home Press Releases Papiamentu 2012 Krea Pániko Innesesario no ta Benefisiá Kòrsou
Krea Pániko Innesesario no ta Benefisiá Kòrsou
Wednesday, 24 October 2012 10:25
VBC, Asosashon di Komersio ke duna un Pabien Grandi na Kòrsou, pa e forma ku e elekshon di Parlamento a tuma lugá. No tabatin ningun insidente di importansha loke a demostrá e sivismo ku Kòrsou ta poseé. VBC igualmente ta felisitá e partidonan polítiko ku a resultá ganador den e kontienda elektoral.

Awor ku e elektorado a duna un mandato mester spera ku e gobernantenan polítiko ta bai hasi e máksimo esfuerso pa mehorá progreso i bienestar pa tur siudadano di Kòrsou. Ta bon konosí ku tin un kantidat di problema sosial, finansiero i ekonómiko ku pais ta konfrontá, ku lo mester keda atendé i solushoná ku urgensha. Ta evidente ku esfuerso i yudansa di tur sektor lo mester ta envolví pa aselerá e mehorashon nesesario.

E interpretashon generalisá di polítikonan hulandes i prensa, ku e resultado di elekshon ta un eskoho pa independensha ta masha simplista, muchu pura i hasta iresponsabel. Sin ningun motibu, e ta afektá e klima di bida i invershon komo tambe e konfiansa den stabilidat ku ta asina importante. VBC ta kondená análisis i konklushonnan inkorekto ku ademas ta karakterisá pa prehuisio .

Na promé lugá, Independensha no tabata un “issue” den e último elekshon. Na di dos lugá ta 22.6% di elektorado a vota pa partido Pueblo Soberano, e úniko partido ku ta menshoná i aspirá independensha. 22.6% no ta un mayoria. Na di tres lugá, i posiblemente e motibu di mas kardinal, ta pueblo di Kòrsou mester tin e último palabra riba e pregunta si Kòrsou ke independensha òf no. Por sierto, e punto di salida klave aki a keda konfirmá i rekonosé pa partido Pueblo Soberano.

Riba prensa hulandes, mester hasi konsekuentemente un apelashon urgente pa no krea pániko sin nodi. Kòrsou por lo pronto, mester di trankilidat i alivio, despues di tantu aña kaba di diskushon riba struktura estatal.

VBC ta afirmá ku aworakí ta ora pa atendé nos problemanan menshoná i tin e konvikshon ku Hulanda lo por duna un aporte positivo i konstruktivo pa solushon di e interogantenan ku ta riba mesa.

Curaçao, 24 òkt. 2012
Direktiva di VBC

 
Copyright © 2020 Vereniging Bedrijfsleven Curaçao. All Rights Reserved.
Joomla! is Free Software released under the GNU/GPL License.