Home Press Releases Papiamentu 2012 Kòrsou tin mester di lider ku nivel haltu di integridat
Kòrsou tin mester di lider ku nivel haltu di integridat
Sunday, 14 October 2012 20:00

Tur kos ta indiká ku Kòrsou tin dos opshon dia 19 di Òktober próksimo: Vota pa prinsipio òf vota pa plaka. VBC, Asosashon di komersio i industria di Kòrsou, ta hasi un apelashon urgente na tur hende ku ta bai vota, pa nan pensa bon kua ta e mihó kaminda ku Kòrsou mester sigui pa un mihó futuro.

E kantidat di indikashon i prueba ku e nivel di integridat di e anterior gobièrnu di MFK/PS/MAN  ta na suela, kada dia ta oumentando. Esaki a trese serka un gran parti di nos sosiedat e realisashon ku den un espasio di tempu rápido di dos aña Korsou a a kay den un situashon ku Dr. Tennyson Joseph di e Universidat di West Indies a fórmula asin’aki:

“Criminalization of the state. A point at which the politics of ideas, freedom, democracy, sovereignty and national self-determination gave way to the politics of money in a changed political culture driven by a new genre of politician… whose skills set is no different from that of the petty thief and average con man”.

For di e análisis aki  di Dr. Joseph por saka afó  ku e tendensha aki lamentablemente a kué forsa den e region di Karibe.  Partinan grandi di e sosiedatnan regional, ta sinti nan mes atraé pa e forma aki di hasi polítika ku e generashon aki ta utilisando. Aki por menshoná paisnan manera Jamaica, Sürnam, Guyana i Trinidad & Tobago kaminda e prosesonan aki a keda señalá.

VBC, modestamente ta kere ku Kòrsou no ta nada sirbí ku e direkshon aki i ku konsekuentemente mester hasi lo máksimo pa evitá ku nos ta bai kai den e situashon aki. Ademas, te asina leu ku nos por a kai den e abismo ei kaba, ta imperativo pa drai e situashon aki bek ku urgensha. VBC ta boga pa un maneho i aserkamentu ku ta dirigí pa alkansá un nivel haltu di integridat di gobernante, parlamentario i otro lidernan di e sosiedat. Investigashon a demonstrá ku un nivel haltu di integridat ta promové e sentido demokrátiko ku ta e base pa logra un bon gobernashon, seguridat hudisial, konfiansa i stabilidat komo tambe un klima di bida i di invershon saludabel i atraktivo. Mester konsiderá pa laga e siguiente komponentenan forma parti di un tipo di maneho asina.

  • Eksigensha di integridat i konosementu pa gobernante, na e mesun nivel ku sektor privá ta apliká;
  • Prensa independiente, honesto i profeshonal;
  • Skrining independiente i profeshonal pa gobernante, unda na final ta publiká e resultado di e proseso importante aki.
  • Reforsá institutonan manera Prokuraduria General/ Ministerio Públiko, Banko    Sentral , Órgano di Konsulta, Konseho Sosial Ekonómiko, Ombudsman, Universidat nashonal i tur e kompanianan di gobièrnu.
  • Siudadanonan bon eduká i krítiko ku ta asertivo i no ta kana pa loko tras di polítikonan.
  • Nada di intimidashon i violensha verbal ku ta oumentá e kultura di miedu.

E notisia ku e Gabinete Interino  a diseñá un lei nobo di skrining kual ta bai keda ofresé na Parlamento pa aprobashon ta masha positivo i meresé sosten general.

Ta parse ku den e terminologia di Dr. Tennyson Joseph, dia 19 di Òktober próksimo Kòrsou ta pará na un krusada ku e siguiente opshonnan: Vota pa prinsipio of vota pa plaka.

Curaçao, 15 Oktober 2012
Direktiva VBC

 
Copyright © 2020 Vereniging Bedrijfsleven Curaçao. All Rights Reserved.
Joomla! is Free Software released under the GNU/GPL License.