Home Press Releases Papiamentu 2012 MFK/PS/MAN a hiba un maneho finansiero desastroso
MFK/PS/MAN a hiba un maneho finansiero desastroso
Thursday, 11 October 2012 20:00

E publikashon resien di Minister Presidènt i e anterior Sekretario General di Ministerio di Finansa, ta konfirmá e situashon sumamente krítiko di finansa públiko. Ademas, e informashonnan aki ta konfirmá e análisnan realisá pa e Kolegio di Supervishon Finansiero.

Kada biaha ta birando mas kla, ku e gabinete anterior di e partidonan MFK/PS/MAN a hiba un maneho finansiero desastroso i a purba di tur manera pa kamuflá esaki, ora ku konsientemente no a duna nos sosiedat informashon of a duna informashon robes.

 

VBC ta altamente disgustá ku e eks-gabinete den su totalidat a disidí di pone tur e prinsipionan demokrátiko básiko, manera integridat i transparensia un banda. Ku esaki nan a hisa benta e idea di un gobernashon efektivo un banda. i mester apuntá ku nan a logra di hasi esaki pasombra e mayoria ku nan tabatin den Parlamento a kolaborá konsientemente ku esaki, poniendo nan bista otro un banda i fungi komo e famoso “rubber-stamp” di gobièrnu.

Komo ku e Parlamentarionan aki  no a paga atenshon nesesario na asuntunan finansiero, e eks-gobernantenan a haña e oportunidat pa gasta sumanan grandi di plaka di komunidat na un kantidat di asuntu ku tin hopi interogante, pa loke ta e benefisio ku nan tin pa nos sosiedat. Por ehèmpel, kiko tur e biahenan kostoso ku e eks Minister Presidènt  i  minister di asuntunan ekonómiko a realisá na tur parti di mundu, a produsí konkretamente pa Kòrsou? Meskos por puntra di e retironan duná na funshonario di kompanianan di gobièrnu ku a kosta masha plaka. Kiko por bisa di e transporte i vigilansha eksagerá pa gobernante, miéntras ku poblashon mes ta sufriendo di kriminalidat i violensha sin sentido. Tambe por hasi menshon di fotógrafo personal i otro gastunan ku normalmente nos gobièrnunan di turno den pasado no a hasi.

E konsekuensha di e maneho finansiero desastroso ta poniendo ku kada dia tur hende ta sinti e efekto mas i mas: Ménos konfiansa den gobernashon i kresementu ekonómiko, oumento di impuesto i primanan sosial, tarifa mas haltu pa utilidat i produktonan petrolero, ménos kupo di trabou, ménos entrada i chèns grandi ku lo mester redusí e penshun di behes i redukshon di e nivel di kuido médiko i seguridat i peliger di devaluashon di florin.

E úniko manera pa pone un fin na e desaroyonan super negativo aki i pone nos bek riba e kaminda drechi ta pa elektorado disidí ku e no ta tolerá e tipo di gobernashon aki mas, sino mas bien ta bai kastigá e gobernantenan ku a hinka nos pais den e buraku enorme aki. Ta pueblo ku ta bai vota tin e poder pa bòltu e situashon aki i logra ku nos por bolbe kuminsá papia di “Dushi Kòrsou”.

Curaçao, 12 òktober 2012
Direktiva VBC

 
Copyright © 2020 Vereniging Bedrijfsleven Curaçao. All Rights Reserved.
Joomla! is Free Software released under the GNU/GPL License.