Home Press Releases Papiamentu 2012 Kalidat di bida di Kòrsou ta den wega
Kalidat di bida di Kòrsou ta den wega
Wednesday, 19 September 2012 08:26

Kòrsou ta birando dia pa dia un peliger serio pa tur siudadano en general i empresario en partikular. Ku resentimentu total, VBC, Asosashon di Komersio i Industria, a tuma nota di e asesinato  brutal di un pareha, den e di tantísimo atrako kometé den pais. Último tempu kada biaha por ripara ku siudadano i empresario ku ta traha duru, ta bira víktima di atrako, robo komo tambe tiroteo ku morto komo konsekuensha. Palabranan sinsero di kondolensha na e famia di esnan ku a fayesé ku e hecho tristu aki, totalmente inaseptabel.

Mientrastantu, e sintimentu ku outoridatnan enkargá ku maneho di krímen no ta kontrolando esaki, ta oumentando. E hechonan ta bira kada dia mas brutu i violento. Sigur ta ku e kredibilidat i konfiansa den e den e plannan presentá pa minister di hustisia i outoridatnan polisial ta bahando den forma konsistente. Ya ta asina ku hopi hende no ta kere mas den solushon i ta sinti nan mes tambe mas tantu menasá. E desaroyo aki ta masha peligroso pasombra e ta habri kaminda pa hendenan buska moda di defendé nan mes. Esei por pone ku Kòrsou ta hañ’é den un “wild wild west” ku naturalmente lo menasá ekonomia i nos klima di invershon. Ménos invershon ta nifiká mesora ménos kresementu ekonómiko ku konsekuensha di ménos kupo di trabou, oumento di pobresa i ku esei mas kriminalidat i atrako. Mester pone un paro na e spiral negativo aki i bir’é den direkshon kontrali.

Ta kla pa tur hende ku aworakí mester restablesé e regla di lei i òrdu. No mester pensa únikamente riba mas polis riba kaya, sero toleransha i komunikashon mas intensivo entre polis i bario (polis den bario) ku empresanan di seguridat, sino tambe buska yudansa di afó. Ta di mas agregá ku mester pone un paro igualmente na uso di violensha verbal i físiko den seno polítiko. Gobernante i Parlamentario mester duna e bon ehèmpel. Bon ehèmpel ta haña siguidó pero awor ta parse hopi ku e ehèmpelnan malu tin bentaha den haña siguidó. E opshon pa laga sosiedat paga pa bo protehá bo mes ku hopi “body guard” armá ta un opshon ku no ta hustu. Ta tur miembro di e sosiedat kurasoleño tin e derecho di keda protehá pa estado.

Aworakí ta restablesimentu di e kalidat di bida di Kòrsou ta den wega. Mester hasi un apelashon na un i tur pa duna na man. Di nos outoridatnan mester spera akshon i mas akshon. Mester asumí e responsabilidat i mustr’é pa e bira visibel. Si esaki no sosodé, ta warda nos e situashon angustioso di lei den man di kada ken, loke lo nifiká final di Dushi Kòrsou komo estado demokrátiko.

Curaçao, 19 sèptèmber 2012

Direktiva VBC

 
Copyright © 2020 Vereniging Bedrijfsleven Curaçao. All Rights Reserved.
Joomla! is Free Software released under the GNU/GPL License.