Home Press Releases Papiamentu 2012 Krisis Aktual: Rumbo pa Destrukshon di nos Ekonomia
Krisis Aktual: Rumbo pa Destrukshon di nos Ekonomia
Sunday, 16 September 2012 23:20

Kòrsou a bira ingobernabel. Esaki ta e afirmashon ku VBC lamentablemente mester yega na dje, tumando kuenta di e último susesonan polítiko. Ku e situashon aki formando un menasa serio pa e desaroyo ekonómiko i sosial ya frágil di Kòrsou, VBC ke duna 24 ora pa gobernante i parlamentarionan lokal, yega na un akuerdo. Si esei no logra, mester apliká e Medida General di Supervishon Real (AMRB) pa re-establesé nos demokrasia parlamentario.

E situashon  apsurdo i kaótiko  aki ta konsekuensha direkto di e pregunta si a baha e (eks)-presidente di Parlamento si òf no. E último aki a aktua totalmente sin koutela i kontra di tur aspekto di derecho , ora ku e so a disidí di suspendé tur reunion di Parlamento te ku otro aviso. Ku esaki e (eks)-presidente a pone un di e derechonan fundamental di e mayoria di un Parlamento un banda. Pió ainda ta e hecho ku ora por a spera ku e Minister Presidènt demisionario, destituí òf no, lo a yama atenshon di e (eks)-presidente riba su komportashon anti-demokrátiko, ta resultá ku mas bien tin aki un konspirashon. Ku esaki Kòrsou a bin kai den un situashon kaminda no ta honra e prinsipionan di “Trias-Politica”, tumbando nos estado di derecho demokrátiko. E aktuashon aki ta mustra den direkshon di un gòlpi di estado.

E desaroyo i uso di violensha verbal, komo tambe opstrukshon kompañá ku violensha físiko ta menasante i totalmente inaseptabel. Kòrsou, kontinuando riba e kaminda aki, lo mester tene kuenta ku e posibilidat grandi ku víktimanan lo kai. Esaki ta nifiká mesora tambe perdishon di e ekonomia ku tur e konsekuenshanan negativo ku esaki lo trese kuné. Ta evidente ku Turista i Invershonistanan di buena fe no ke tin nada di haber ku menasa, instabilidat i intrankilidat.

VBC ta boga pa restablesé rápidamente demokrasia, stabilidat i trankilidat, kaminda na kabes mester tin rèspèt pa e regla prinsipal di un estado demokrátiko vigente, esta ku ta mayoria ta disidí. Posiblemente mester apliká artíkulonan 2:41 I 2:42 di Kódigo Penal, ku den e kaso aki por kontribuí. Sin solushon, Medida General di Maneho di Reino ta e úniko opshon.

Curaçao 14 sèptèmber 2012

Direktiva VBC

 
Copyright © 2020 Vereniging Bedrijfsleven Curaçao. All Rights Reserved.
Joomla! is Free Software released under the GNU/GPL License.