Home Press Releases Papiamentu 2012 Presidente di Parlamento Ivar Asjes a kometé un gòlpi di estado
Presidente di Parlamento Ivar Asjes a kometé un gòlpi di estado
Friday, 31 August 2012 20:00

Kontrali na loke e presidente di Parlamento di Kòrsou a afirmá ta resultá ku e no a evitá un gòlpi di estado pero ku ta ku ta e mes a kometé e gòlpi di estado. Djabièrnè dia 24 di Ougùstùs, presidente di Parlamento a suspendé tur reunion di Parlamento, bou di e preteksto ku e no ta bai kooperá ku un gòlpi di estado parlamentario. E suspenshon no tin límite di  tempu. Esaki ta enserá ku diskushon i partisipashon di Parlamento no ta permití. E presidente a tuma e desishon aki riba su mes.  Pa e siguiente motibunan, VBC, Asosashon di Komersio i Industria ta kondená e aktuashon di e Presidente di Parlamento, desaprobando esaki totalmente.

  • Ponementu di Parlamento, e órgano di mas haltu di pais un banda ta anti- demokrátiko, no permití i ilegal.
  • Mal uso di poder: E presidente den forma flagrante a malusá e poder ku ta bai kompañá ku e funshon.
  • No ta e presidente ta disidí kon mester interpretá e Reglamento di Òrdu pero ta e Parlamento den su totalidat ta hasi esei.  Ta inkonsebibel i inaseptabel ku e presidente riba su mes ta disidí di imponé un prohibishon pa Parlamento keda ketu i no reuní.
  • E aktuashon di e presidente ta diktatorial i ta un violashon di e prinsipionan fundamental di e estado di derecho kurasoleño.  Totalmente sin koutela i en bèrdat mas bien fuera di lei.  Pa tur klaridat mester stipulá ku no ta promé biaha ku e presidente aktual di Parlamento ta realisá e tipo di práktikanan kondenabel aki.

E hecho ku un mayoria di Parlamento a manda un karta pa gobernador, den kual nan ta kondená e aktuashon di e presidente i ta hasi un apelashon urgente pa realisá un ronda di konsulta al respekto, ta algu ku VBC ta sostené sin mas.

Sinembargo, VBC ta kere ku no mester keda te aki, pa restablesé demokrasia den pais.  Komo tal, VBC ta hasi un apelashon riba tur e Parlamentarionan ku ta na fabor di un estado demokrátiko pa nan hasi uso di tur e medidanan di lei na nan alkanse, pa logra e meta aki. Por pensa aki entre otro pa konhuntamente, esta komo un bloke, kuminsá un proseso hudisial sivil i / òf proseduranan di ámbito di maneho hudisial i organisashon di akshonnan di protesta.

Un biaha mas VBC den forma enfátiko ku mustra riba e hecho ku instabilidat polítiko i di gobernashon tin un efekto negativo pa kresementu ekonómiko i desaroyo. No tin espasio pa otro opshonnan, ora ku mester kuminsá  solushoná e problemanan soshal-ekonómiko struktural gigantesko ku Kòrsou ta konfrontá.

Curaçao,  1 sèptèmber 2012
Direktiva VBC

 
Copyright © 2020 Vereniging Bedrijfsleven Curaçao. All Rights Reserved.
Joomla! is Free Software released under the GNU/GPL License.