Home Press Releases Papiamentu 2012 Daño hasí na proseso demokrátiko ta menasá bienestar di Kòrsou
Daño hasí na proseso demokrátiko ta menasá bienestar di Kòrsou
Wednesday, 15 August 2012 17:13

VBC ta hasi un apelashon urgente na Presidente di Parlamento i na Promé Minister pa bandoná e práktika di eliminá nos “Trias Politica” i pa restablesé e proseso demokrátiko di Kòrsou. Si Presidente di Parlamento i Promé Minister sigui sera boka di Parlamento anto ta keda únikamente un alternativa: Aplikashon di artíkulo 43 di Statüt, pa bergonsoso ku esaki lo por ta. Reino lo mester kumpli ku su obligashon i lo mester garantisá ku ta respetá e derechonan fundamental,  sin mas tardansa. E humiashon i entrega di outonomia ku esaki ta enserá lo mester bai tambe totalmente riba kuenta di Presidente di Parlamento i Promé Minister di pais.

VBC ta altamente sorprendí i preokupá pa e hecho ku ya pa dos siman largu, ta trapando e reglanan di nos estado demokrátiko. Susesonan di hopi peso manera kaida di Gobièrnu i e instrukshon di gobièrnu di Reino aparentemente no ta sufisiente importante pa e órgano mayó di pais, esta Parlamento, deliberá riba nan. E presidente di Parlamento i  Gobièrnu (lesa Promé Minister) te na e momentonan aki a hasi un reunion di Parlamento imposibel. Nan ta usa e argumento ku un diskushon den Parlamento i/òf aseptashon di un moshon di deskonfiansa no tin sentido, pasombra ta Gobièrnu ta disidí si ta ehekutá un moshon òf no. Ademas, e presidente di Parlamento ta konsiderá e aktuashon di e partidonan di oposishon komo anti-demokrátiko.

Serka hopi hende e pensamentu aki di e presidente a kousa masha preokupashon. VBC modéstamente ta kere, ku tur kos ta mustra ku e forma ku e presidente  i Promé Minister ta aktua, ta indiká ku nan ke sera e boka di Parlamento i kita su poder, loke ta un akto ku no ta demokrátiko. E wega di un pa otro, pa asina pone e representashon di pueblo un banda ta kontra di tur regla di demokrasia. Mas bien por pensa ku aki tin un intento pa asumí poder total, o sea un tipo di gòlpi di estado. E hecho ku tin un koordinashon di akshon entre presidente di e órgano legislativo di mas haltu di pais di e Promé Minister, pa asina pone parlamentarionan un banda, ta simplemente inaseptabel.  Aki por papia di un violashon flagrante di  derecho humano fundamental i libertatnan, seguridat hudisial i bon gobernashon.

Klaramente por konkluí ku di e forma aki no ta duna un kontribushon di rèspèt i alsamentu di e prinsipionan demokrátiko komo tambe e tradishonnan.

Ta konosí pa tur hende, ku na e momentonan aki Kòrsou ta konfrontá un serie di problema grave, ku mester keda atendé i solushoná rápidamente.  Ta bon pa mustra komo tal riba e siguiente interogantenan, ku ta determinante pa un bon desaroyo di pais:

  • Défisitnan formal, ku a kondusí na e instrukshon di Reino.
  • Problemanan ku défisit riba Balansa di pago.
  • Deskrédito i paralisashon di institutonan importante manera Banko Sentral, VDC, Prokuraduria General i Ministerio Públiko.
  • Kresementu ekonómiko limitá.
  • Défisitnan formal den seguro sosial i médiko.
  • Forsa di kompra ku ta bayendo atras ku oumento di primanan i inflashon.
  • Infrastruktura defisiente i problemanan den enseñansa.
  • Seguridat personal i di propiedat.
  • Integridat di Gobernantenan.

Pa por alkansá solushon duradero pa tur e menasanan aki, VBC ta kere ku mester tin konfiansa i un aserkamentu konhunto. Eliminashon di demokrasia no ta e solushon. Al kontrario, un kultura di intimidashon i duna miedu únikamente lo kondusí na deskonfiansa i nepotismo i lo no kontribuí na un klima di bida i di invershon transparente, konstruktivo i inspirante.

Invershonistanan di buena fe ku esaki lo eludí Kòrsou, miéntras ku siudadanonan ku ta traha duru i ta respetá nos leinan, kada biaha lo bai pensa mas tantu riba emigrashon. VBC ta boga pa restablesé rápidamente nos estado di derecho demokrátiko, pasombra esaki ta esun ku ta duna e mihó garantia pa mantenshon i mehorashon di prosperidat i bienestar pa e siudadanonan di Kòrsou.  

Kòrsou, 15 ougùstùs 2012
Direktiva VBC

 
Copyright © 2020 Vereniging Bedrijfsleven Curaçao. All Rights Reserved.
Joomla! is Free Software released under the GNU/GPL License.