Home Press Releases Papiamentu 2012 Gabinete Schotte to ta realisá su mes vishon
Gabinete Schotte to ta realisá su mes vishon
Thursday, 08 March 2012 20:00

VBC, Asosashon di Komesio i Industria di Korsou, ta hasi un apelashon urgente na gobierno pa na interés di Korsou, bandoná e kaminda di konfrontashon i buska esun di dialogo. E aserkamentu polarisante di e gabinete di prome minister Gerrit Schotte  lo no resultá den e vishon ku su gobierno a ekspresá na momento ku ela tuma asiento.

 

E vishon ta: “Pa 2025, Korsou mester ta un pais ku por konta ku bon gobernashon, klima di bida haltu, desaroyo sosial ekonómiko duradero i un enseñansa ku ta motivá tur hende di saka lo máksimo di su kapasidat”.

Mas bien ta konstatando ku e aserkamentu aktual, lo bai kondusí na redukshon drástiko di prosperidat, afektá i daña e klima di bida i bienestar, komo tambe oumento di e konfliktonan.

Ta ku tristesa profundo i enormenente desapuntá mester konstatá ku e gabinete di MFK/ PS/ MAN no ta dispuesto pa efektivamente kumpli ku e vishon ku nan mes formulá.

Al kontrario, na lugá di inklui un momento di reflekshon, e gobierno actual di Korsou ta insistí den implementá un maneho ku ta basá pa konsientemente kibra instituto i entidatnan esensial i balioso, ku ta e fundeshi di e demokrasia di Korsou. Sin mas por menshona e siguiente institushonnan riba kual sistemátikamente e gabinete ta atentá kontra dje:

  • Poder Hudisial;
  • Parlamento;
  • Prensa Liber;
  • Banko Sentral di Korsou i Sint Maarten;
  • Servisio di Seguridat di Korsou;
  • Empresenan, Fundashonnan i Servisonan Publiko importante manera Aqualectra, Curoil, Refineria di Korsou, UTS, CPA, Universidat di Korsou, Registro Sivil (Kranshi) .
  • Na e lista largu aki mientras tantu mester agregá e instituto di Ombudsman.

Ta logiko ku por a spera e konsekuensha negativo di e aserkamentu di “kibra kos” aki i kada dia nan ta manifestando nan mes den forma mas konkreto ku entre otro:

  • Ketu bai un sosiedat dividí ku ta birando mas duru loke ta manifestá su mes ku mas ekspreshon di protesta, oumento di e kantidat di kasonan den Korte, lekmentu di datonan personal i manifestashonnan di protesta (Frente Sivíl).
  • Afektashon di e konfiansa i empeoramentu di e klima di invershon. Esaki a keda konfirmá tambe pa e resultado di e enkuesta di konyuntura di Desember 2011, ku e Ofisina Sentral di Estadístika a realisá.  Mester ta klá pa tur hende ku e desaroyo aki lo bai akompañá ku perdida di kupo di trabou, redukshon di entrada, bahamentu di divisa, o sea menos kresementu pero hasta kontrakshon di ekonomia loke ta un resept pa pobresa.

 

Pa boltu e situashon aki VBC ta hasi e apelashon urgente na gobierno pa na interes di Korsou e buska awor e  kaminda di dialogo.

Curaçao, 9 maart 2012
Direktiva di VBC

 
Copyright © 2020 Vereniging Bedrijfsleven Curaçao. All Rights Reserved.
Joomla! is Free Software released under the GNU/GPL License.