Home Press Releases Papiamentu 2019 Mas énfasis riba redukshon di gastu di Gobièrnu
Mas énfasis riba redukshon di gastu di Gobièrnu
Thursday, 25 July 2019 12:11

Asosiashon di Komèrsio i Industria di Kòrsou (VBC) a tuma nota di e “Akuerdo di kresementu” (Groeiakkoord) i ta di opinion pa loke ta trata finansas públiko ku e medidanan anunsiá no ta balansá. Unilateralmente a pone énfasis riba oumento di entrada. E medidanan aki lo por kondusí na mas atraso ekonómiko, desempleo i pobresa.
Tambe nan lo kondusí na mas inflashon, mas emigrashon/braindrain, debilitá posishon di kompetensha, menos entrada, menos forsa di kompra, baha balor di propiedatnan inmobil, i daña sirkunstansia di bida (siguridat, enseñansa i kuido médiko).

VBC pertinentemente ta rechasá e maneho aki, ku a establesé sin ningún dialogo real ku partnernan sosial. Kiko mester hasi anto?
VBC ta boga ku “strong sense of urgency” pa un maneho ku ta dirigí riba:
  • Enfasis riba redukshon di gastu di Gobièrnu.
  • Stimulashon di kresementu ekonómiko dor di tuma e medidanan di reformashon struktural.

Ta korekto ku den e “Groeiakkoord” a pone kresementu ekonómiko sentral. E medidanan i proposishonnan nombrá sinembargo ta muchu vago i na opinion di suskritonan mester ta mas konkreto i mester ehekutá esakinan.
Entre otro:

  • atendimentu ku burokrasia dor di e.o. introdukshon di e prinsipio di aprobashon fiktisio, posibelmente un lei di urgensia, introdukshon di e konsepto di “Public Service Commission” , deregulashon, privatisashon;
  • baha gastu di hasi negoshi (energia, utilidat), subi produktividat laboral i mehoransa di posishon di konkurensha (sueldo mínimo, Lei di Bion);
  • modernisáshoni simplifikashon di sistema di impuesto i un servisio di impuesto adekwá, efektivo I simpátiko pa ku kliente. Mas énfasis riba impuesto indirekto i redukshon di impuesto direkto;
  • fleksibilisashon di merkadonan, spesialmente merkado laboral (lei di retiro, sesantia, dianan ku no ta paga pa motibu di malesa (carensdagen), LTU/LAV);
  • gobernashon apropiá, stabilidat gubernamental (nombramentu di Minister di Ekonomia) i fortifikashon di institutonan manera Kontrolaria General di Kòrsou i Ofisina Sentral di Statistik;
  • atendé ku e falta di koördinashon riba merkado laboral (re-entrenamentu,formashon);
  • restrukturashon di sistema di seguridat sosial (kompetensha; aporte propio).

En partikular mester duna aktividatnan dirigí riba eksportashon i produktor di divisas, espasio pa nan sigui krese den forma duradero. Speshalmente turismo, servisio finansiero internashonal i sektor di komèrsio.
E medio por ekselensha pa atendé e problemanan finansiero i sosial-ekonómiko grandi ku kual Kòrsou ya pa largu tempu ta ser konfrontá kuné I duna siudadanonan perspektiva pa futuro, ta kresementu struktural di ekonomia i ku esei krea kuponan di trabou nobo.
Un yamamentu urgente ta bai pa Gobièrnu pa hinka tur energia pa krea e kondishonnan adekuá pa realisá e kresementu aki. Ayudo for di eksterior ta indispensable den esaki. Tambe ta nesesario pa tin konsulta I dialogo real ku partnernan sosial pa di tal forma amplia apoyo pa un ke otro. Divishon i kreashon di intrankilidat sosial no ta konseptonan konstruktivo. E medidanan lo kousa dolor pa tur hende, pero nos mester tumanan pa krea perspektivanan real di kresementu i bienestar.


Kòrsou, 25 yüli 2019
Direktiva VBC

 
Copyright © 2019 Vereniging Bedrijfsleven Curaçao. All Rights Reserved.
Joomla! is Free Software released under the GNU/GPL License.