Home Press Releases Papiamentu 2018 Akshonnan resien i desishonnan di Gobièrnu relashoná ku Instrukshon (Aanwijzing) di CFT i Enseñansa Gratis
Akshonnan resien i desishonnan di Gobièrnu relashoná ku Instrukshon (Aanwijzing) di CFT i Enseñansa Gratis
Tuesday, 06 February 2018 08:13

E desishonnan i akshonnan resiente di Gobièrnu tokante e tópikonan di un posibel Instrukshon di CFT i Enseñansa Gratis tin aprobashon di parti di Asosiashon di Komèrsio i Industria di Kòrsou (VBC).

Na promé lugar ta un desishon hopi balente di Minister-Presidènt pa hala aden e lei di Enseñansa Gratis. Enseñansa gratis ta un lei masha simpátiko i sosial pero hopi kostoso, ku tantu Gobièrnu komo Direktivanan di Skol mester ehekuta i paga. Den e situashonnan presupuestario difisil aktual no por sigui sostené e lei aki. E partisipashon ku entrante aña eskolar 2018-2019 ta bini un fin na esaki i ku ta bai hiba un maneho kaminda entradanan abou ku realmente tin mester di sosten pa paga gastunan eskolar, ta haña un kompensashon, ta un alternativa mas realístiko.

Den e boletin notisiero di VBC di yanüari 2018, entre otro a dediká atenshon na finansas públiko den aña 2018. Na e okashon ei a sita e menasa di CFT pa bai over na un posibel Instrukshon (Aanwijzing).

E akshonnan i ehersisionan rápido di Minister di Finansas, kende a pone alternativanan riba mesa pa evitá un Instrukshon ta korekto i meresé sosten. Un instrukshon probablemente lo ta kontené medidanan fiskal drástiko i ekstremo, loke lo trese huntu kune efektonan negativo pa nos ekonomia. E ponensia di Minister di Finansas ku no tin espasio pa oumentá peso fiskal pasobra esaki lo traha kontra-produsiente, ta korekto i tin sosten kompleto di parti di VBC.

Meskos ku Minister, VBC ta sali for di e punto di bista ku e pasonan ku a tuma i e kambionan implementá lo ta sufisiente pa konvensé Konseho di Minister di Reino ku un Instrukshon no ta nesesario. VBC ta duna elogio na Minister pa su esfuersonan.

E energia desisivo demostrá dor di Gobièrnu relashoná ku e tópikonan menshoná, ta rason pa VBC spera ku mas asuntunan esensial, ku tin ku kondusí na mas kresementu di ekonomia i mehoransa di nos klima di invershon, manera un merkado laboral mas fleksibel, maneho di imigrashon i dunamentu di pèrmit i bürokrasia, lo ser tratá riba tèrmino kòrtiku.

Kòrsou, 6 febrüari 2018.

Direktiva di Asosiashon di Komèrsio I Industria di Kòrsou (VBC)

 
Copyright © 2019 Vereniging Bedrijfsleven Curaçao. All Rights Reserved.
Joomla! is Free Software released under the GNU/GPL License.