Home Press Releases Papiamentu 2017 Práktikanan di intimidashon , destrukshon i violensia ta inakseptabel
Práktikanan di intimidashon , destrukshon i violensia ta inakseptabel
Wednesday, 19 April 2017 12:28

Ku durante  antesala pa elekshon di 28 di aprel 2017, lo tin  hopi emoshon, ta komprendibel i por hustifiká esaki. Loke si ta inakseptabel ta e praktikanan di intimidashon, destrukshon, violensia verbal i físiko i atentadonan  direkto.

Ku indignashon tin ku konstatá ku frekuensia i intensidat di e práktikanan malignonan aki ta sigui oumentá i ta mustra di ta bira peor.E punto di mas abou di e momentu aki ta e atentado riba sede di partido polítiko PAR ku  Molotov-kòktail.Asosiashon di Komèrsio i Industria ta desaprobá e akshon i métodonan aki kompletamente, komo ku esakinan ta intolerable.Por sierto eksperiensia den otro paisnan a demostrá ku sigui riba e kaminda aki ta algu sin pena ni gloria, ya ku esaki lo kondusí únikamente na violensia sin sentido i debilitashon di prinsipionan demokrátiko i estado di derecho.E tipo di akshonan absurdo aki ta funesto pa klima di invershon i di bida atraktivo i salú.

Un yamamentu urgente ta bai na outoridatnan kompetente pa sin aplasamentu tuma e medidanan adekuá pa mas pronto posibel hasi esfuerso pa pone un paro na esakinan. Tambe ta pidi komunidat pa duna un man den  esaki dor di ta alèrto i mèldu akshonnan sospechoso na outoridatnan. Podiser mester konsiderá pa imponé un forma di derecho rápido (snelrecht)pa e delitonan aki.

Na elektorado tambe ta bai un yamamentu urgente pa no rekompensá e tipo di práktikanan altamente dañino i maligno aki , pero di kastigá esakinan  fuertemente. Un komunidat ku ta edifiká riba prinsipionan di toleransha, sivilisashon, rèspèt pa opinion di otronan, bida i propiedat, ta duna muchu mas tantu perspektiva ku un ku ta basá riba poder, miedu i odio.

Kòrsou, 19 aprel 2017
Direktiva VBC

 
Copyright © 2019 Vereniging Bedrijfsleven Curaçao. All Rights Reserved.
Joomla! is Free Software released under the GNU/GPL License.