Home Press Releases Papiamentu 2017 Metementu di mandatario polítiko den rekonekshon di awa ta mal pensá i altamente irresponsabel
Metementu di mandatario polítiko den rekonekshon di awa ta mal pensá i altamente irresponsabel
Friday, 07 April 2017 10:02

E instrukshon di gabinete interino Pisas na Aqualectra pa rekonektá e bibiendanan di kual a sera nan kuenta inmediatamente bèk riba e ret di awa, sin ku ta konosí ken ta bai paga pa e kuentanan di awa atrasá aki ta, na opinion di Asosiashon di Komèrsio i Industria di Kòrsou (VBC), un akto mal pensá i altamente irresponsabel.

  • Na humilde opinion di VBC, a lanta empresanan di Gobièrnu spesialmente pa evitá metementu di Gobièrnu ku e operashon diario di e empresanan aki. Ta fundamentalmente robes si un Gobièrnu kier hiba i realisá un maneho sosial/anti-pobresa via di e entidatnan gubernamental aki.
  • For di e rapòrt di enkuesta sivil di Prof. Mr. Willems ta resultá klaramente kiko ta e konsekuensianan ora ku mandatarionan polítiko, bou di e preteksto di representashon di akshonista , bai sinta riba stul di direktiva di e empresanan di Gobièrnu aki. Bahamentu di tarifa  di koriente di e tempu aya , sin ku tabatin motibu pa esaki i transferensha di akshonnan “por nada”, a pone ku Aqualektra a bai para na rant di bankarota. Despues di esi komunidat mester a paga karu pa evitá ku un ke otro lo  a sosode. Awor gabinete interino Pisas ta duna un “intrukshon (aanwijzing)” pa rekonektá e klientenan ku a kòrta nan awa bèk riba e ret di tuberia di awa. Ta parse ku istoria ta bai ripití su mes i klaramente ta keda demostrá ku tin algun mandatario polítiko ku no kièr siña di lèsnan di pasado.
  • Aqualectra no ta un instituto filantrópiko, sino un empresa ku mester pèrkurá pa produsí i entregá awa  i koriente na komunidat den un forma mas efisiente posibel kontra e miho preis i kalidat. Entrega i garantisando e previshon básiko aki ta di un importansia krusial  pa desaroyo i kresementu sosial/ekonómiko duradero. Esaki ta konta tambe pa nos posishon di kompetensha i klima di invershon. Pa garantisá esaki un bon maneho finansiero ta sumamente nesesario. Ta di spera ku minister finasas lo sirbi komo vigilado di finansas publiko.

E instrumento “deskonektá kliente for di ret di awa i koriente”  ta un parti esensial di e pakete finansiero operashonal di direktiva di Aqualectra i ta un medio importante pa por operá i aktua ophetivamente. No ta deseabel ku mandatarionan politiko komo representante di akshonista bai mete nan mes direktamente ku e asuntu aki pa e no resultá den dunamentu di privilegio di un pa otro i na kada ken su antoho.

Pa hiba un maneho sosial/anti-pobresa lo por konsiderá pa introdusí un maneho di supsidio obhetivo pa klientenan den e kategoria di min- en onvermogend berdadero.

 

Kòrsou, 6 aprel 2017
Direktiva Asosiashon di Komèrsio i Industria di Kòrsou (VBC)

 
Copyright © 2019 Vereniging Bedrijfsleven Curaçao. All Rights Reserved.
Joomla! is Free Software released under the GNU/GPL License.