Home Press Releases Papiamentu 2017 Elekshon mester sigui pa krea stabilidat i trankilidat
Elekshon mester sigui pa krea stabilidat i trankilidat
Thursday, 30 March 2017 10:12

E situashon i desaroyonan polítiko aktual ta forma motibunan di hopi preokupashon. Ta parse ku e instabilidatiI inseguridat gubernamental ta mas bien indiká di ta oumentando, tambe pa motibu  ku e gabinete interino nobo obviamente no ta desea di kumpli ku e enkargo di formashon. Te kaminda Asosiashon di KomèrsioiI Industria di Kòrsou  (VBC) a komprendé e enkargo aki tabata formula brevemente: “forma un  gabinete interino  ku por konta riba sosten di un mayoria den Parlamento i ku ta kapas pa den un forma balansá, mantené prinsipionan di un estado di derecho demokrátiko, teniendo  kwenta ku “checks and balances” entre órganonan di estado i sòru pa trankilidat gubernamental”.

 

E prinsipal enkargonan ku e gabinete mester ehekutá ta pa sigui hasi preparashonnan pa i ehekutá elekshon ku ta dekretá pa 28 di aprel 2017 i pa atendé asuntunan koriente.

E gabinete interino nobo a haña ku ta miho pa konsentrá i dediká na suspenshon respektivamente anulá elekshon. E eskoho i maneho aki ta di lamentá komo ku esaki lo kaba den un esfera di inkonfiabilidat/ inkredibilidat i disturbio sosial.

Na opinion di VBC e desaroyo aki ta funesto pa klima di invershon i empresarial loke lo no kontribuí na mehoramentu di un ekonomia ku ya pa basta tempu ta stanká. Problemátikanan sosial importante manera desempleo, insufisiente entrada, pobresa, siguridat, bibienda , enseñansa bon i kwalifiká i kuido médiko lo no haña solushon duradero asina aki.

Mester enfatisá ku tantu stabilidat i trankilidat gubernamental komo sosial ta masha importante . I pa logra esaki mas lihe i miho posibel ta dor di garantisá ku e elekshon planeá pa dia 28 di aprel 2017 ser realisá.

Esfuerso di Gobernador pa realisá esaki ta altamente apresiá i sostené. Estado di derecho demokrátiko ta sirbí ku esaki. Tambe esaki ta promové realisashon di klima di invershon saludable i atraktivo riba tèrmino kòrto.

 

 

Kòrsou, 29 mart 2017
Direktiva di Asosiashon di Komèrsio i Industria di Kòrsou  (VBC)

 
Copyright © 2019 Vereniging Bedrijfsleven Curaçao. All Rights Reserved.
Joomla! is Free Software released under the GNU/GPL License.