Home Press Releases Papiamentu 2016 Efektonan Negativo di Subida di Sueldo Mínimo
Efektonan Negativo di Subida di Sueldo Mínimo
Friday, 09 December 2016 15:59

Resientemente Ministerio di Desaroyo Ekonómiko (MEO) a tene un presentashon pa Dialogo Nashonal riba e konsekuensia ekonómiko ku por spera di subida di sueldo mínimo entrante 1 yanüari 2017, konforme e Areglo Ministerial (MR) PB 2016 nr. 14.

For di kalkulashonnan di MEO (mira anekso) ta resultá e.o. ku kresementu ekonómiko real lo baha ku 1,3%, desempleo lo oumentá, posishon di kompetensha lo empeorá, un spiral di sueldo/preis lo bai manifestá. E kalkulashonnan únikamente ta trata aña 2017. No a kalkulá ainda e efekto di e otro oumentonan di sueldo mínimo (30% mas adishonal) den e añanan siguiente. Lo no ta difisil pa rei kiko esakinan lo ta.

E analisis i kalkulashonnan di MEO ta konfirmá loke VBC ya a trese na varios okashon kaba dilanti (mira e.o. Newsletter VBC edishon novèmber 2016). Ehekushon di e MR di Minister di SOAW, lo tin konsekuensia sosial ekonómiko negativo pa Kòrsou. Esakinan lo manifestá nan mes den limitashon ekonómiko, oumento di desempleo i ku esei, pobresa, empeoramentu di posishon di kompetensha i klima di invershon, den poko palabra, konfiansa den ekonomia di Kòrsou.

E Investigashon i konklushonan di MEO no a hasi ningun impreshon riba Minister di SOAW i di sindikatonan. Nan ta di opinion ku oumento di sueldu mínimo mester sigui i ku esei konsientemente a skohe pa retraso di ekonomia, oumento di desempleo i empobresimentu. De fakto un repartimentu di pobresa i eskases.

Pa VBC e vishon, aktitut i desishon di Minister di SOAW i sindikatonan ta inkomprendibel i sumamente desepshonante.

E gremionan aki pues ta esunnan responsabel pa e malestar sosial ekonómiko ku por spera i intensidat di esaki. No por reklamá dunadonan di trabou ku a avisá pa esaki i no por pone nan responsabel tampoko.

VBC a la bes kier mustra riba un aspekto partikular den e diskushon aki, esta si e MR di Minister di SOAW a keda realisá den un forma kuidadoso i si no a aktua kontra stipulashonnan legal eksistente.

Konforme stipulashonnan di Lei di sueldo mínimo mester tende Konseho Sosial-Ekonómiko (SER) ora ku Minister kier implementá adaptashon di sueldo mínimo (art. 9 insiso 8). Además den kaso di oumento outónomo di sueldo mínimo mester papia di un motibu spesial (art. 13, insiso2).

Na opinion di VBC no a kumpli ku e stipulashonnan legal (ainda) i konsekuentemente mester pone legalidat di e MR konserní na duda.

For di istoria legal ta resultá e.o. ku wes den prome instansha den un huisio sumario di 27 desèmber 1971 a yega na e konklushon ku mester kumpli ku e disposishonnan legal di tende SER pa un MR por ta implementable.

Ta posibel ku e obligashon legal aki aña 2016 ainda ta na vigor i ku Minister no a fija riba esaki?

VBC ta ripití ku tin tur rasonnan pa ekonomia, kupo di trabou, kombatimentu di pobresa, hurídiko ets. pa tuma e MR di Minister di SOAW den rekonsiderashon i reemplasá esaki ku un pakete di medida mas ekilibrá ku además ta kumpli ku tur stipulashonnan legal

.

Macro-economische Effecten 2017


 
Copyright © 2019 Vereniging Bedrijfsleven Curaçao. All Rights Reserved.
Joomla! is Free Software released under the GNU/GPL License.