Home Press Releases Papiamentu 2016 Skohe pa mantenshon di kupo di trabou ta e mihó e opshon
Skohe pa mantenshon di kupo di trabou ta e mihó e opshon
Tuesday, 30 August 2016 14:35

Hopi lamentabel ta e akshon di wèlga ku SGTK a yama na refineria, komo ku inkietut laboral no ta aportá ku nada na e nesesidat urgente di rekuperashon ekonómiko duradero di Kòrsou. E sorto di akshonnan aki no ta bon pa klima di invershon.

Ta inkomprendibel ku sindikato ta opta pa oumento di sueldo di no menos ku 26% na lugar di mantenshon di trabou.  En kambio no tin un base presente pa hustifiká un oumento di sueldo dje eksorbitante ei. Ya pa desena di añanan kresementu ekonómiko ta stagná i/of tabata marginal, produktividat laboral  a baha i desempleo ta sigui relativamente altu.  Riba esaki ta bini aserka e hecho ku PDVSA ku ta e prinsipal kliente tin problemanan finansiero grave pa motibu di preis abou di krudo riba merkado mundial. Dentro di e kuadro ei lo ta muchu mas realista pa skohe pa e opshon di mantenshon di kupo di trabou, manera AAV ta opiná ku su rason. Si pèrde trabou tur kos ta kaba. 

Awor ku SGTK a skohe pa yama un wèlga ta di spera ku esei lo sosodé di un forma responsabel. Blokeamentu di kamindanan públiko i strobamentu di orden públiko ta inakseptabel. Antisipando mester rechasá tambe blokeamentu di entrada pa di e forma aki hasi entrega di zeta i kombustibel difisil. Komunidat no mester bira víktima di e tipo di medidanan disproposhonal. Den e kuadro ei ta hustifiká ku Minister di Desaroyo Sosial, Labor i Bienestar (SOAW) ta konsiderá pa proklamá un periodo di fría kabes i trese partidonan na mesa di negosashon. Un yamamentu ta bai na partidonan pa buska solushon di e konflikto via di e kaminda aki.

Kòrsou 30 ougùstùs 2016
Direktiva di Assosiashon di Komèrsio i Industria di Kòrsou (VBC)

 
Copyright © 2019 Vereniging Bedrijfsleven Curaçao. All Rights Reserved.
Joomla! is Free Software released under the GNU/GPL License.