Home Press Releases Papiamentu 2016 Subida di sueldo mínimo no ta bon pensá
Subida di sueldo mínimo no ta bon pensá
Thursday, 25 August 2016 16:21

Asosiashon di Komèrsio i Industria di Kòrsou (VBC) a tuma nota di proposishonnan di Minister di Desaroyo Sosial, Labor i Bienestar (SOAW) sra Larmonie i di Parlamentario di partido PAIS sr. Cleopa pa subi e sueldo mensual mínimo aktual, basá riba un siman di trabou di 40 ora di Naf. 1.420,44 ku respektivamente 39% (pa Naf. 1.976,00 ) i 76% (pa Nf. 2.500). Komo motibu (prinsipal) pa e adaptashon aki ta argumentá protekshon di mínimo di eksistensha di e trahador.

Banda di e aspekto sosial, ku ta parti importante di bida, tin tambe e aspekto di realidat ekonómiko.

For di e tabèlnan ku ta sigui aki bou ta resultá ku awe na ougùstùs 2016, kresementu ekonómiko ta marginal (0.5% por averahe anual den e último 10 añanan), produktividat laboral a baha (kumulativa-mente mas ku 25%) i ketu bai tin desempleo haltu.Kada ken ku tin algu di konosementu di ekonomia lo por konkluí, ku bou di e sirkunstansianan aki , lo ta ekonómikamente irrasonabel pa subi sueldo mínimo asina drástiko.

Otro argumentonan kontra e subida drástiko aki ta :

  • Den kurso di añanan korektamente a indeksá sueldo mínimo (pa siman laboral di 40 ora) pa mantenshon di poder di kompra i esaki ta mas altu ku e nivel di pobresa ku CBS a kalkulá.
  • E argumento pa tuma e famia di un adolesente, ku dos yu komo norma pa « famia modelo » dor di Minister ta lanta hopi pregunta. Dor di esaki ta duna un salvokondukta na e progenitor di e yunan aki ku e no tin mester di aportá na nan mantenshon. De fakto ta pasa e responsabilidat di e individuonan aki riba komunidat. Asina aki e forma di bida ideal sosial mester ta òf nos ta papia aki mas bien di interpretashonnan i proseder irresponsabel i asosial ? Si e progenitor tuma su responsabilidat i aportá di su parti, e entrada di e tipo di famianan aki tambe lo surpasá e nivel di pobresa.
  • Banda di e sueldo primario dunadónan di trabou lo ser konfrontá ku e kondishonan di trabou sekundario (e.o. prima di seguro sosial) ku lo oumentá entre 40- -75% òf mas haltu. Pa un persona ku sueldo mínimo mensual di Naf. 1.976.- e dunadó di trabou ta hañele konfrontá ku gastu salarial pa persona di entre Naf. 2.766 i Naf. 3.478. Na un sueldo mínimo di Naf. 2.500,- e gastu salarial pa persona ta bira entre Naf. 3.500,- i Naf. 4.400,- pa luna. Un oumento fuerte di ‘costs of doing business ‘ ku lo wòrdu reforsá ku e preshon di e salarionan , a kousa di subida drástiko di e salario mínimo”.Den kombinashon ku produktividat laboral disminuyente lo ta opvio ku dunadónan di trabou lo ta sumamente kuidadoso pa tuma hende den servisio o podiser hasta lo bai over na redusí personal. Menos kupo di trabou legal i konsekuentemente desempleo lo ta resultado di un ke otro. For di ki dia por konsiderá un maneho dirigí na oumento di desempleo komo un maneho sosial? Lo por garantisá mínimo di eksistensha asina aki ? Kòrsou lo tin benefisio dor di empeoramentu di su posishon di kompetensha ?
  • Oumento di ‘ cost of doing business’ ta resultá hopi biaha den oumento di preis. Un spiral di sueldo/preis lo no ta imaginario ku tur e konsekuensianan di esaki.
  • Den práktika aktual personanan ku ta gana sueldo mínimo no ta suheto na impuesto di sueldo (loonbelasting) i ta haña un deskuento riba nan prima di malesa (BVZ). Ta e intenshon pa e práktika aki sigui asina ora ku subi sueldo mínimo drástikamente ? Ta sobra bastante hende pa proveé e entrada di impuesto i primanan di seguro sosial nesesario ?
  • Ki sentido tin pa kontinuá ku e inisiativa di Dialogo Nashonal awor ku Minister di SOAW unilateralmente ta disidí di pusha e tipo di proposishonnan asina aki ? Ademas ta un pregunta si artíkulo 9, insiso 7 di Lei riba Sueldo Mínimo ta duna un base fundá pa dekretá un Areglo ministerial pa subi sueldo mínimo temporalmente. Ademas SER no a wòrdu aserka pa duna un konseho riba e tema aki.

Konkluyendo por determiná ku e rasonnan ku a duna pa subi sueldo mínimo drástikamente realmente no ta bon pensá ni sólido. Mas bien ta parse ku en bista ku elekshon ku ta na kaminda i pa motibunan polítiko ta e base pa bini ku e proposishonan populístiko aki ku lo tin konsekuensia negativo grandi pa ekonomia.

Ta di lamentá ya ku e maneho aki lo no ta na benefisio di interes general.

 

 

 

 

 

 

 

 

Kòrsou 25 ougùstùs 2016

Direktiva di VBC

 
Copyright © 2019 Vereniging Bedrijfsleven Curaçao. All Rights Reserved.
Joomla! is Free Software released under the GNU/GPL License.