Home Press Releases Papiamentu 2016 Bon gobernashon ta nesesario pa krea konfiansa
Bon gobernashon ta nesesario pa krea konfiansa
Friday, 15 July 2016 12:36

Asosiashon di Komèrsio i Industria di Kòrsou (VBC) a tuma nota di konklushonnan ku a aparese den medionan di publisidat for di rapòrt di Prof. Huub Willems tokante “Investigashon na maneho I prosedimentunan na Aqualektra, Refineria di Kòrsou (RDK) i Curoil”.

Ta resultá ku tantu na Aqualektra ku na Refineria di Kòrsou (RDK) bou di Gabinete Schotte (MFK/PS/MAN) tabata tin mal maneho (atministrativo i finansiero) grave e.o. dor di metementu direkto di polítika den gerensia empresarial, nombramentu di dirigentenan inkompetente, imponementu di adaptashonnan di tarifa empresarial irresponsabel, djis pa promové propio popularidat polítiko i deroche di kapital di RDK ku nada menos ku Naf. 262 miyon di florin.

Resultado di e rapòrt menshoná ta konfirmashon di loke en grandes rasgos ya tabata konosí. Hopi hende anteriormente a mustra kaba riba e konsekuensianan negativo di e maneho desastroso di gabinete Schotte na e empresanan di utilidat i a insistí na toma di medidanan pa garantisá bon maneho.

Ta ser sperá awor di Gobièrnu ku resultado di rapòrt Willems lo habri kaminda pa tuma e medidanan apropiá kontra esunnan ku ta responsabel pa e mal maneho hibá na e empresanan di sektor di energia.

No por ta asina ku ta pueblo mester karga ku e konsekuensianan negativo di mismanagement grave di algun dirigente. I laga e asuntu aki pasa bai pa su kuenta sin konsekuensia lo ta un siñal pa otronan pa drenta polítika pa enrikesé nan mes pasobra mal maneho ta duna benefisio.

Entretantu nos ta pará na bíspera di otro elekshon. Ta di spera ku elektorado lo laga prinsipionan di bon gobernashon konta pisá den e desishon pa kua partido i/òf kua polítiko lo vota.

Asosiashon di Komèrsio i Industria di Kòrsou no por laga di enfatisá ku bon gobernashon :

  • ta un parti esensial pa mantenimentu i mehoramentu di estado di derecho i demokrasia ;
  • ta importante pa garantisá derechinan humano fundamental, siguridat hurídiko i kalidat di bida (quality of life ) ;
  • nesesario pa engrandesimentu di konfiansa, accountabilty i responsabilidat ;
  • bon pa transparensia.

Kresimentu ekonómiko duradero, entrada i trabou lo keda realisá i garantisá unikamente ora ku konfiansa ta reina. Bon gobernashon ta un di e komponentenan prinsipal den e proseso pa krea i oumentá konfiansa.

Kòrsou 15 di yüli 2016

Direktiva di Asosiashon di Komèrsio i Industria di Kòrsou (VBC)

 
Copyright © 2019 Vereniging Bedrijfsleven Curaçao. All Rights Reserved.
Joomla! is Free Software released under the GNU/GPL License.