Home Press Releases Papiamentu 2016 Krannan di konteiner den haf
Krannan di konteiner den haf
Wednesday, 17 February 2016 09:20

Informashon  di prensa tokante e estado den kual e krannan di konteiner di nos haf ta i perspektiva no muchu kla ku pronto lo bini un solushon pa e problemátika aki, ta duna rason pa masha hopi preokupashon.

Mester kwalifiká e estado tékniko di e krannan komo inkonfiabel. Nan por kibra kualke momentu ku tur e konsekuensia pa nos ekonomia ku ta dependé di importashon di produkto. E daño ekonómiko lo ta grandi si e krannan no funshoná mas i e desaroyo aki tambe lo tin konsekuensianan finansiero i sosial  negativo.

Riba tereno polítiko ta indesishon ta loke ta reina I por lo pronto no tin indikashon ku ta bai bin kambio den esaki. T’asina si ku Konseho di Minister a  bai di akuerdo ku un proposishon, pero den Parlamento  presidente di frakshon di un di e partidonan di koalishon ya a indiká ku e no ta di akuerdo ku esaki.

Kòrsou ta bayendo den e situashon ku lo no tin krannan  (Gantry) funshonando den haf.

Barkunan ku mester deskargá merkansia lo evitá di drenta aki i ta baha nan karga ku ta destiná pa e isla na otro lugarnan. Importadornan lo tin ku hasi èkstra gastu pa trese e konteinernan aki Kòrsou. Pa e konsumidor esaki ta nifiká (hopi) tardansa i preis mas altu. Pa e isla esaki lo resultá den un daño konsiderabel di su imagen.

Asosiashon di Komèrsio i Industria di Kòrsou (VBC) ta ripití ku outoridatnan di haf, den e kaso aki gobièrnu lo ta responsabel pa e èkstra gastu ku esaki ta trese kune dor di e aktuashon defisiente i total negligensha. Importadornan ta konsiderando pa tuma pasonan hurídiko pa rekobrá e gastunan adishonal, respektivamente daño sufri.

Pa evitá e desaroyonan indeseá aki ta bai un biaha mas un yamamentu urgente na partidonan responsabel, en partikular mandatario- i parlamentarionan pa tuma desishon mas pronto posibel pa atkirí i renobá e krannan Gantry den haf. Ku karta di fecha 4 òugustus 2015 VBC ya a manda e mensahe aki pa gobièrnu. Te na e momentu aki no a bini ningun reakshon di parti di gobièrmu.

 

Kòrsou, 17 febrüari 2016

Direktiva di VBC

 
Copyright © 2019 Vereniging Bedrijfsleven Curaçao. All Rights Reserved.
Joomla! is Free Software released under the GNU/GPL License.